Цахим наадам долдугаар сарын 11, 12-нд нэг цагт болно

Улсын баяр наадам зохион байгуулахтай холбогдуулан Наадмын комиссоос мэдээлэл хийлээ. Цахим наадмын нээлт, төсвийн тухай Урлаг соёлын салбар хорооны гишүүн, Үндэсний их театрын дарга Г.Цоггэрэл хэлэхдээ:

“Цар тахалтай үед хийгдэж байгаа гэдэг утгаараа цахим наадамд аль болох бага зардал шингээж байгаа. Гэвч энэ жилийн наадмын дэглэлт, найруулга өнгөрөгч жилийнхээс өөр, давтагдашгүй байлгахыг Б.Баатар найруулагчаас хүссэн.

Монгол Улс байгуулагдсаны 815, Ардын хувьсгалын 100 жилийн ойн Үндэсний их баяр наадмын нээлт, хаалтын концертыг Н.Наранбаатар, Г.Цоггэрэл, Б.Баатар нар хамтран найруулана.

Энэ жилийн хувьд “Нарны домог” концепцыг барьж ажиллаж байна. Бүгд эвтэй байвал ямарваа хүчин зүйлд давагдашгүй хүчтэй байхыг илтгэж байгаа. Бэлтгэсэн контент дэлхийд цацагдах учир “Монголын ард түмэн бидний сэтгэл санааг өргөх юм хийжээ” хэмээн харагдах наадмыг зохион байгуулна.

Өмнөх жилүүдэд наадмын нээлт, хаалт 600 сая байсан бол энэ жил ариутгал хийх зардал, уран бүтээлчдэд чанартай хоол, эм бэлдмэл авах мөнгийг тусгаж 850 сая төгрөгөөр хийнэ.

 Наадмын нийт төсөв өнгөрсөн жилийн  теле наадмын төсөвтэй ижил байх бөгөөд наадмын төсвийг нийслэлийн төсвөөс гаргадаг болохыг тодотгож байна гэлээ. 

Ямар ч наадмыг шүүмжилдэг. Гэхдээ бид хийх ёстой. Энэ бол бидний үүрэг. Үндэсний их баяр наадмын арга хэмжээ болох хүчит бөхийн барилдаан, хурдан морины уралдаан, сур, шагайн харвааны арга хэмжээг долдугаар сарын 11, 12-нд болдог өдрөө цахим хэлбэрээр нэг цаг үед шууд дамжуулна ” гэв.

Иргэдийн дунд яригдаад байгаа 10 тэрбумын төсөв гэдэг бол бүтэн жилийн турш 100 жилийн ойн бүхий л арга хэмжээнд төсөвлөх мөнгө байсан. Гэвч энэ төсвийг цар тахлыг эрсдэл багатай даван туулах арга хэмжээнд зориулахаар шийдвэр гарсныг энд сануулъя.

Үндэсний их баяр наадмыг дан ганц Соёлын яам бус   Шадар сайдын  баяр наадмыг зохион байгуулах хорооны хариуцан ажилладаг юм.