БЗД-ийн нэгдсэн эмнэлэгтэй холбоотой халдварын голомтоос 244 хүн өвчилж, цаана нь 1,500-аад ойрын хавьтал байна гэдэг нь маш том дэгдэлт гэдгийг ХӨСҮТ-ийн Тандалт, судалгааны албаны дарга А.Амбасэлмаа сануулав.
Мөн тэрбээр “Өнөөдөр шинээр илэрсэн коронавирусийн 20 тохиолдлын 18 нь Улаанбаатар хотод үүсээд байгаа БЗД-ийн нэгдсэн эмнэлгийн голомттой холбоотой хавьтлууд байна.
Өчигдөр тус голомтын хамааралтай Тэнүүн-Огоо гэдэг компанийн ажилтан, автобусны хоёр жолоочоос халдвар илэрсэн.
Тухайн компанийн 10 жолооч бөөнөөрөө салхинд гарсан байна. Тэдгээрийн дотроос хоёр хүнээс коронавирус илэрлээ. Бусад хүмүүсийг нь одоогоор тусгаарлаад байгаа.
Тухайн автобус баазын жолоочийн ойрын болон хоёр дахь хавьтлын 90 гаруй хүнээс шинжилгээ авсан. Одоогоор халдвар илрээгүй байна” гэсэн юм.
“Шинэ он гарахад хэдхэн хоног үлдээд байна. Шинэ жилийн баярыг гэр бүлийн хүрээнд цомхон тэмдэглэх шаардлагатай.
Дээрх тохиолдол шиг хэд, хэдээрээ нийлж салхинд гарвал халдвар авах эрсдэл өндөр байна. Тиймээс иргэд үүнийг онцгой анхаарч, эрүүл мэндийн байгууллагаас өгч буй зөвлөмжийг дагахыг зөвлөж байна” гэв.
