Эрүүл мэндийн яамнаас коронавируст халдварын нөхцөл байдлын талаар мэдээлэл хийж байна.
ХӨСҮТ-ийн Тандалт, судалгааны албаны дарга Ж.Байгалмаа: "Сүүлийн хоногт 15,293 хүнд хийсэн коронавирусийн халдвар илрүүлэх шинжилгээний явцад 148 хүнээс халдвар илэрсэн. Ингэснээр нийт халдварын тоо 4,806 болж байна.
Сүүлийн 24 цагт гадаадаас зөөвөрлөгдсөн тохиолдол бүртгэгдээгүй. Дотоодын халдварын 148 тохиолдлын 143 нь Улаанбаатарт, Хөвсгөл аймагт 5 тохиолдол бүртгэгдсэн. 143 халдвар авсан хүнээс 137 нь ойрын хавьтал байна. 11 хүний халдвар авсан эх уурхайг тогтоохоор ажиллаж байна.
Шинээр батлагдсан 160 тохиолдлын 141 нь халдвартай хүмүүсийн ойрын хавьтлууд бол 19 хүний халдварын эх уурхайг тогтоохоор ажиллаж байна.
Халдварын эх уурхайг нь тогтоож байгаа хүмүүсийн оршин суух хаяг:
- Налайх дүүргийн 4 дүгээр хороо,
- БЗД-ийн 13, 20 дугаар хороо,
- БГД-ийн 6, 8 дугаар хороо,
- СХД-ийн 34, 35, 37, 42 дугаар хороонд байна.
Сүүлийн хоногт 55 хүн эмчлэгдэн эмнэлгээс гарснаар нийт эдгэрсэн хүний тоо 3,351 боллоо.
Өнөөдрийн байдлаар нийт 1,359 хүн эмчлүүлж байгаагаас биеийн байдал нь хөнгөн 1,200, хүндэвтэр 146, хүнд 9, нэн хүнд 3 хүн байна.
Халдварын нөхцөл байдал өдөр ирэх тутам хүндэрч байгаа. Тиймээс хувь хүмүүс нийгмийн харилцаагаа багасгах хэрэгтэй" гэв.
Дотоодод бүртгэгдсэн халдварын тохиолдол 4,273
- Улаанбаатар-3,915 /сүүлийн 24 цагт 143 тохиолдол нэмэгдэв/
- Завхан-6
- Архангай-4
- Орхон-25
- Төв аймаг-18
- Сэлэнгэ аймаг-217
- Дархан-Уул-45
- Говьсүмбэр-4
- Дорноговь аймаг-32 байна.
- Хөвсгөл-12 /сүүлийн 24 цагт 5 тохиолдол нэмэгдэв/
Вакцинжуулалтын явцын талаар:
ЭМЯ-ны хэлтсийн дарга Г.Болдмаа мэдээлэл өглөө. Тэрбээр "Гуравдугаар сарын 19-ний байдлаар нийслэлд 43 цэг, 104 баг ажиллаж, нийт 17,656 хүнийг дархлаажуулсан. Мөн Өмнөговь аймгийн 9 суманд 1,148 хүнийг дархлаажуулалтад хамруулсан. Ингээд улсын хэмжээнд нийт 189,969 хүнийг дархлаажуулаад байна.
Иргэдэд халуурах, толгой өвдөх, тариулсан газар хөндүүрлэх, булчингаар өвдөх зэрэг хөнгөн хэлбэрийн шинж тэмдэг илэрсэн. Дархлаажуулалтад өдөрт ойролцоогоор 15-20 мянган хүнийг хамруулж байгаа. Ази номхон далайн бүс нутгийн орнуудад вакцинжуулалт хийгдсэн байдлаас гуравдугаар сарын 17-ны өдрөөр харахад манай улс гуравдугаар байранд буюу 4.21 хувийн үзүүлэлттэй байна. Энэтхэг улсад үйлдвэрлэсэн 75 мянган хүн тун АстраЗенека вакцин дууссан. Мөн Солонгос улсад үйлдвэрлэсэн 7,200 хүн тун АстраЗенека вакцин бас дууссан. Синофармын вакцины 150 мянган хүн тунгаас 107,769 хүн тун одоогоор хийгдээд байна. 189,969 хүн тунг бид ашигласан.
Синофарм вакцины 42,231 хүн тунг ашиглаад байна. Үүнийг 43 цэгт тараасан. ХӨСҮТ-ийн нөөцөд давтан тунд зориулагдсан вакцин байна. Синофармын давтан тунг дөрөвдүгээр сарын 15-наас, АстраЗенекаг дөрөвдүгээр сарын 23-наас хийж эхэлнэ" гэлээ.
