Цэцэрлэг ээлжийн багштай боллоо. Эхний ээлжинд энэ хичээлийн жилд 6 дүүргийн 25 цэцэрлэгт 60 багш туршилтаар ажиллуулна. Ингэснээр цэцэрлэг 07.00-20.00 цаг хүртэл, өдөрт 12 цагаар ажиллана. Улаанбаатарын түгжрэлийн шалтгааны 25 хувь сургууль, цэцэрлэгийн хөдөлгөөнтэй холбоотой.
Багш нараас авсан судалгаагаар нийт багш нарын 80.7 хувь нь ажлын ачаалал “маш их” болон “их” гэж хариулсан бөгөөд багшийн ажлын ачаалал өмчийн хэлбэрээс хамаарч ялгаатай байна. Төрийн өмчийн цэцэрлэгт ажиллаж байгаа багшийн ачаалал хувийн өмчийн цэцэрлэгийн багштай харьцуулахад 20 гаруй хувиар илүү их байгаад нэг бүлэг дэх хүүхдийн тоо өндөр, өдөрт 10 цагаар ажиллаж байгаа зэрэг нөлөөлж байна.
Цэцэрлэгийн багш өглөө 7.30 цагаас хүүхэд хүлээн авч, 17.30 цаг хүртэл тасралтгүй 10 цаг ажиллан холбогдох хууль тогтоомжид заасны дагуу илүү цагаар ажилласан (2 цаг) хөлс авдаг хэдий ч тэд ихэнх тохиолдолд өдөрт 11-12 цаг ажиллаж байна. Багшийн ажлын ачаалал их байдгаас сургалт, үйл ажиллагаандаа бэлтгэх, өөрийгөө хөгжүүлэх цаг бага, мөн эцэг эх, асран хамгаалагчийн ажил эхлэх болон тарах цаг, цэцэрлэгийн тарах цагтай давхацдагаас хот суурин газруудад замын хөдөлгөөний түгжрэл үүсдэг зэрэг хүчин зүйлийг харгалзан цэцэрлэгийн хүүхэд хүлээн авах, тарах цагт уян хатан зохицуулж ээлжийн багш ажиллуулах зайлшгүй шаардлага үүсэж байна.
Ээлжийн багшийг цэцэрлэгт ажиллуулснаар цэцэрлэгийн хүүхэд хүлээн авах болон тарах цаг уян хатан болсноор эцэг эх, асран хамгаалагч хүүхдээ цэцэрлэгт хүргэж өгөх, авахад үүсдэг хүндрэл болон замын түгжрэл буурч, иргэдийн бухимдал багасан, гэр бүлдээ зарцуулах цаг нэмэгдэх боломжтой. БШУЯ-наас 2021-2022 оны хичээлийн жилд Улаанбаатарын 6 дүүргийн 25 цэцэрлэгт 60 ээлжийн багшийг туршилтаар ажиллуулахаар шийдвэрлэн бэлтгэл ажлыг хангаж байна.
