Хэзээ ч мартагдахгүй цэрэг эрсийн "Шинэ жил"

Монгол улсынхаа тусгаар тогтнол, бүрэн эрхт байдлын төлөө цаг ямагт зүтгэж байдаг Монгол улсын ууган ангиудын нэг Зэвсэгт хүчний 015 дугаар ангид уригдан очих завшаан надад олдсон юм.

2023 оны намрын цэрэг татлагаар 80 гаруй залуус тус ангид алба хаахаар морьдсон бөгөөд эдгээр залуус дунд миний том хүү Б.Бат-оргил багтсан билээ. Ээж аавын хүү, эх орны хөвгүүд болон алба хааж, тангараг өргөсөн өдөр саяхан.

Он солигдох торгон мөчид тэд шинэ жилийн арга хэмжээндээ ээж аав нараа урин оролцуулж шилдэг байлдагчдаа шалгаруулж амжилт бүтээлээ дүгнэлээ.

Хувьсгалт тэмцлийн ахмад зүтгэлтэн Хурандаа Осорын Цэрдарийн нэрэмжит Цэргийн Гавьяаны Улаан Тугийн Одонт Зэвсэгт Хүчний 015-р ангийн хамт олон алба хаагч нарынхаа авьяас чадварыг нь хөгжүүлэх зорилгоор "Яг түүн шиг" шоуг энэ үеэр зохион байгуулсан юм.

Тус арга хэмжээг ээж аавын төлөөлөл үзэж, нэг өдрийн үйл ажиллагаатай нь танилцаад зогсохгүй нэг өдрийг хэзээ ч мартагдахааргүй дурсамж дүүрэн баяр хөөртэй өнгөрүүллээ.

Эх орноо хамгаалах эр цэргүүдийн авьяас билэг дундрашгүй арвин юм. Тэд "Хар сарнай", "Rokit Bay" зэрэг алдартай дуучдыг дуурайж өрсөлдсөн бөгөөд ээжийн хайртай хүү Б.Бат-оргил дэд байрт шалгарч чадсан юм. "Яг түүн шиг" шоуны тэргүүн байрт шалгарсан байлдагчдад өргөмжлөл, үнэ бүхий зүйлээр шагнаж урамшууллаа.

Ийм сайхан арга хэмжээг зохион байгуулж нэгэн өдрийг ээж аавын хамтаар дурсамж дүүрэн өнгөрүүлэх боломжийг олгон, чин сэтгэлээ зориулан зохион байгуулсан ангийн захирагч, хурандаа Ц.Батсайхан болон ангийн бие бүрэлдэхүүнд, эцэг эхчүүдийн өмнөөс баярласан талархснаа илэрхийлье.

Байлдагч Б.Бат-оргилын ээж Ц.Бямбаа