Төрдөө итгэж, хуулийг хэрэгжүүлж ирсний утга учир хаана байна аа, Ерөнхийлөгч өө

               Уламжлалт анагаах ухааны элэг судлалын клиник төвийн асуудлаар энэ 2024 онд Төрийн тэргүүн танд гурав дахь удаагаа хандаж байгаа нь энэ.

            УИХ, Засгийн газрын тогтоолын хүрээнд буюу төрийн бодлого шийдвэрийн хүрээнд НИТХ-ын тогтоол шийдвэрээр явагдсан Уламжлалт анагаах ухааны элэг судлалын клиникийн төвийн “Нэмэлт хөрөнгө оруулалт хийх нөхцөлтэй Менежментийн хувьчлал”-ын сонгон шалгаруулалтад оролцож, улмаар 3 жилийн хугацаатай гэрээг биелүүлэн ажиллаж, “гэрээ хангалттай биелсэн” гэдэг дүгнэлттэйгээр дуусгасан. Энэ бүхэн хуулийн дагуу явагдсан байна гэдгийг Монгол Улсын гурван шатны шүүхээр тогтоож, Улсын дээд шүүхээс  эцэслэн “Гэрээг дуусгавар болгосон шийдвэрийг Нийслэлийн өмч хувьчлах комисс-т даалгасугай” гэдэг шийдвэр гарсан. УДШ-ээс эцэслэн гарсан ийм шийдвэрийг барьчихаад хотын удирдлагуудыг царайчилсаар өнөөг хүрч байгаа ба сүүлдээ хууль дагаж хэрэгжүүлж, хуулийн дагуу явснаараа буруутгагдахад хүрч байна. Тодруулбал, бид Төрд итгэж, хуулийг хэрэгжүүлж ирсэн. Гэтэл ингэж төрөө дээдэлж, хуулийн дагуу бүхнийг хийж, хэрэгжүүлж ирсний утга учир хаана байна вэ.

           Нийслэлийн Засаг дарга Х.Нямбаатар, орлогч дарга П.Сайнзориг нар Уламжлалт анагаах ухааны элэг судлалын клиник төвтэй холбоотой маш олон худал ташаа мэдээлэл тарааж, эмнэлгийн Менежментийн багийг ажиллаж чадахгүй байгаа мэт харагдуулахын тулд үйл ажиллагааг нь хүчээр тасалдуулах гэсэн оролдлогыг удаа дараа хийж, бүр сүүлдээ эмнэлгийг буруутгах гэхдээ төрийн байгууллагад байгаа мэдээллээс зөвхөн өөрсдөдөө хэрэгтэй гэснийг гарган цацаж олон нийтийг төөрөгдүүлж байна.  Тухайлбал, тус Клиник төвийн Эмийн үйлдвэрийн барилгыг хотын захиргаа 2010 он актлаж, шинээр  эмийн үйлдвэр барихаар шийдвэрлэсэн боловч явагдаж дууссан хувьчлалыг дуусгавар болгож, Менежментийн багт шилжүүлээгүй. Тиймээс эмийн үйлдвэрийн үйл ажиллагааг тасалдуулахгүйн тулд барилгын дотор талд, эм үйлдвэрлэлийн анхан шатны боловсруулалтын зохих шаардлага хангасан засварыг хийж одоог хүртэл ашигласаар ирсэн. Улмаар энэхүү засварын ажил хийгдсэнийг үндэслэж, НИТХ-ын 2016 оны тогтоолоор нийслэл өмчдөө эгүүлэн өмчөөр бүртгэн авсан.  Гэтэл  актлагдсан барилгад эм үйлдвэрлэсэн зөрчилтэй байгууллага болгон харуулахын тулд  2010 оны акталсан баримтыг үндэслэн,  Хотын захиргааны өмчийн газрын дарга нар, эрүүл мэндийн газартаа гомдол гаргаж, эмнэлгийг буруутгахаар ажиллаж, хуулийг завхруулсаар  байна.

               Менежментийн багийн ахлагч, гүйцэтгэх захирлын албыг хавсран гүйцэтгэж байсан бөгөөд Засгийн газраас намайг, Эрүүл мэндийн яамны Төрийн нарийн бичгийн даргаар томилсон тул хуулийг хэрэгжүүлэн Нийслэлийн өмчийн газарт албан тоотоор  мэдэгдэж, Удирдах зөвлөлийн шийдвэрээр одоогийн гүйцэтгэх захирлыг 2012 оны 10 сараас томилон ажиллуулж байгаа. Өнгөрсөн хугацаанд хувьчлал хуулийн дагуу дууссан ч, Нийслэлийн зүгээс өмчийг шилжүүлэхгүй Нийслэлийн төсөвт байгууллагын харьяалалд хууль зөрчин байлгасаар ирсэн. Тиймээс төсвийн хуулиар эмнэлэгт тодорхой санхүүжилтийг олгож ирснийг Хатанбаатар хувьчлан авчихаад хотын төсвөөс хууль бусаар өнгөрсөн 2008-2022 оны хоорондох хугацаанд  7 тэрбум төгрөг завшсан мэтээр улс орон даяар зарласан. Гэтэл өнгөрсөн 14 жилийн хугацаанд эрүүл мэндийн тусламж үйлчилгээг үзүүлж буй ажилчдын цалин татварын өртөг нь 16,8 /Арван зургаан тэрбум найман зуун сая төг/ тэрбум төгрөг болсон байдаг.

              Монгол Улсад уламжлалт анагаах ухааныг хөгжүүлэх, хүн ардын эрүүл энхийг сахин хамгаалах үйлсэд  ажил хөдөлмөрөө зориулж яваа тангараг өргөсөн эмч хүний хувьд эмнэлэг сувиллыг  хэвээр нь авч үлдэж, иргэд олон нийтэд үйлчилдэг үйлчилгээг хэвийн чанартай явуулахын төлөө Улаанбаатар хотын дарга нарын хууль бус бусармаг  үйлдэл, зүй бус шаардлагуудыг сөрөн хууль, журмын дагуу бүхнийг хийх гэж хичээн зүтгэж ирсэн. Өнгөрсөн 10-аад жилийн хугацаанд Нийслэлийн өмчийн газрынхан гүтгэх, буруутгах ажлыг ичгүүр, айдасгүй хийдэг байсан бол өнөөдөр хотын дарга, орлогч нар өөрсдөө гардан хийдэг болсноос өөр өөрчлөлт гарсангүй. Гэтэл эрүүл энхийн манаанд 30 шахам жил ажиллаж ирсэн хамт олны минь үйлсийг харлуулах гэж оролдож бүр хэрэгт холбогдуулах гэж, түүгээр ч зогсохгүй төрийн шалгаруулалтаар сонгогдсон “менежментийн баг”-ийг хотын дарга дур мэдэн солино гэж нийтэд зарлаж  байгаа нь биднийг цочирдуулж, ямар цаг үед амьдарч байна вэ гэдэг айдас хүйдэс төрүүлж байна.

                Нийслэлийн удирдлагууд эгэл нэгэн эмч миний, энэ байгууллага хамт олны хүч хөдөлмөрийг харлуулж гутаах нь хэрээс хэтэрч байгаа учраас нийслэлийн удирдлагуудын хүч түрсэн гүтгэлэг, ташаа мэдээллийг хэвлэлээр тайлбарлан залруулж, Төрийн тэргүүн танаас эхлээд өргөн олон нийтэд зөв баримттай мэдээллийг хүргэх гэж хичээж, хэдэнтээ ил захидал бичсэн. Монгол Улсын төрийн тэргүүн, Үндэсний аюулгүй байдлын зөвлөлийн дарга танд хандаж буй завсарт эрх мэдэл ихтэй олон даргатай, олон зуун албан хаагчидтай хотын долоо хоног бүрийн шуурхай хуралдаан  дээр “Эмнэлгийг буруутгах, зөрчилтэй байгаа болгох” чиглэл гаргаж, түүнийг нь зарим газрын үүрэг гүйцэтгэгч голдуу дарга нар нь буухиалан өртөөлж, дарамт  учруулах нь улам ширүүсээд  байгааг танд цухас дурдлаа.

                Монгол хүн Монголын баялаг. Монголын баялаг болсон монгол хүний үнэ цэнэ нь эрүүл энх байхад оршдог гэж өргөн олон түмэн үздэг. Монголын баялаг болсон монгол хүний эрүүл энхийн төлөө ажиллаж, 250 гаруй мянган хүнд үйлчилсэн, өдгөө ч үйлчилсээр байгаа эмнэлэг сувиллын үйл ажиллагааг зориудаар мушгин гуйвуулж, одоо бүр ямар нэгэн байдлаар буруутгах гэж оролдож буй нь хэний захиалгыг гүйцэтгэж байгаа ямар гээчийн ажиллагаа вэ гэдгийн хариултыг цаг хугацаа аяндаа гаргаж харуулах нь тодорхой. Хэрэг хуучирдаггүй, хэлсэн үг баримт хэчнээн жилийн дараа ч  баримт болдог учраас өнөөдрийн хотын дарга нар хууль зөрчсөн үг, үйлдэлдээ хариуцлага хүлээх нь зүй. Гэвч өнөөдөр олон түмэнд үйлчилж байгаа эмнэлэг сувиллыг бужигнуулаад эмч, эмнэлгийн ажилтнуудыг ч, тэнд үйлчлүүлж эмчлүүлдэг иргэд өвчтөнүүдийг ч хохироож, хэлмэгдүүлж мэдэх нөхцөл үүсээд байгаа учраас Ерөнхийлөгч Танд дахин хандаад буй нь энэ.

               Монгол Улсын иргэний хувьд, төрийн сонгуульд саналаа өгч төр засгаа сонгох эрхээ эдэлдэг олон олон эгэл жирийн иргэн сонгогчийн адил би Монгол Улсад хууль засаглана гэж таны хэлсэн үгийг итгэл найдвар гэж хүлээж авсан билээ. Тэгвэл бид одоо Төрд итгэж, хууль дагахын утга учир хаана байгаа юм бэ гэдэг асуултыг надад олон хүн тавьж байна. Тиймээ, хотын дарга нар хууль хэрэгжүүлэхгүй юм бол бид хуулийн дагуу бүхнийг хийх нь ямар утга учиртай юм бэ. Магадгүй энэ бол өнөөдөр ганцхан надад, бидэнд ч биш, хуулийг уландаа гишгэдэг дарга нарын үйлдэлд бухимдсан эгдүүцсэн олон хүний асууж байгаа асуулт. Эрх мэдэлтэн, энгийн ард алинд ч хууль ижил тэнцүү үйлчлэх, шударга ёс, үнэт зүйл, ард түмний эв нэгдэл, нийгмийн зөв чиг баримжааг хэн чиглүүлж, хэн хэрэгжүүлэх чиглэлийг өгөх үүрэгтэйг ард түмэн харж, итгэж, хүлээж байгаа гэдгийг хэлэх нь илүүц юм.