Иргэд өөрсдөө дур мэдэн вакцин сонгож хийлгэхгүй
Хоёрдугаар сарын 23-нд манай улс коронавирусийн эсрэг вакцинжуулалтыг эхлүүлсэн. Иргэдийн хувьд ямар вакцин хийлгэхээ сонгох боломжтой гэх мэдээллийг өгч байсан. Тэгвэл Эрүүл мэндийн сайд С.Энхболд тайлбар хийлээ. Тэрбээр "Иргэдийн дунд буруу ойлголт яваад байна. Манай улс дөрвөн төрлийн вакциныг зөвшөөрсөн. Вакцин хийлгэхээс өмнө эмч үзээд харшил, даралт зэргээс шалтгаалан эмнэлгийн заалтаар сонгож хийх болохоос биш иргэдээр өөрсдөөр нь сонгуулна гэсэн үг биш юм. Зөвхөн заалтаар хийж байгаа. Очиход нь дөрвөн вакцин байна, түүнээс сонгож хийлгэнэ гэдэг зүйл байхгүй.Жишээ нь, Спутник, Синофармыг 65-аас дээш насныханд хийж болно, харшил, урвал бага өгдөг.
AstraZeneca вакциныг 65-аас дээш насныханд хийж болохгүй гэдэг зөвлөмж байгаа. ДЭМБ-аас энэ вакциныг гурван оронд түр зогсоосон болохоос биш хэрэглэхийг нь хязгаарлаагүйг мэдэгдсэн. Цусны бүлэн үүсэн тохиолдлын шалтгааныг судалж байгаа. Түүнээс биш AstraZeneca вакциныг бүрэн хориогүй. Манай улс AstraZeneca вакциныг үргэлжлүүлэн хийж байгаа.
Энэ долоо хоногт 50-64 насны 185 мянга, хөгжлийн бэрхшээлтэй 34 мянган иргэнээ вакцинжуулах төлөвлөгөөтэй байна.
