Монгол Улсын Ерөнхий сайд Л.Оюун-Эрдэнэ “Төв замаа дагасан төвлөрлийг задлахын тулд Засгийн газар нийслэл хотыг дэмжихээс өөр аргагүй. Энэ хүрээнд зургаан дэд төв, цаашид 10 дэд төвийг хөгжүүлж, энд хувийн хэвшлийнхэн хөрөнгө оруулах, төрийн байгууллагуудыг хотын зах руу нүүхийг дэмжинэ” гэлээ.
Жишээ нь “Шар хад” дэд төв: Ерөнхий сайд Л.Оюун-Эрдэнэ Шар хад дэд төвийн төлөвлөлттэй танилцлаа. Дэд төв дүүргийн 8,9,10,17,24 дүгээр хорооны нутаг дэвсгэрийг хамрах бөгөөд 300 ортой эмнэлэг, 240 хүүхдийн цэцэрлэг, орон сууц, бусад барилга байгууламж барина. Нэгдсэн эмнэлэг гэхэд л эрүүл мэндийн үндсэн 17, төрөлжсөн 11 төрлийн тусламж, үйлчилгээ үзүүлэх юм. Эмнэлэг барих хөрөнгийг 2022 оны төсөвт тусгана гэж Ерөнхий сайд хэллээ.
2022 оны төсвийн хөрөнгө оруулалтыг дэд төвүүдийг хөгжүүлэх, орон сууц, сургууль, цэцэрлэг, эмнэлэг, ногоон байгууламж барьж, ажлын байр бий болгоход зарцуулах бодлого баримтлана. Ингэж байж төвлөрлийг сааруулж, түгжрэлийг бууруулна” гэв. Мөн Засгийн газар, яам, агентлаг, нийслэл, дүүрэг нэгдмэл бодлоготой байх ёстой гэж үздэгээ илэрхийлэв гэж Засгийн газрын Хэвлэл мэдээлэлтэй харилцах газраас мэдээллээ.
