Өчигдөр орой дөнгөж төрсөн эхийг халад, углааштай, аман дээр нь дэр тавиад авч явахыг хараад Монголын нийгэм шуугилаа. Амаржаад нэг ч өдөр болоогүй байгаа эхийг нярай хүүхэдтэй нь гадуур хувцасгүй, гутал ч өмсүүлэхгүй гэрийн шаахай өмсүүлээд ингээд авч явж байгааг харахад үнэхээр нүд халтирмаар санагдсанаа нуух юун. Энэ үйл явдлыг хараад хүмүүс цахим орчинд дургүйцлээ илэрхийлжээ.
Энэ хугацаанд эх баригч яарч тэвдэн бусад ээж нараас яаралтай тусгаарлан шилжүүлэх үүднээс ХӨСҮТ-ийн тандалтын албаныханд эхийг хүлээлгэн өгөхдөө хариуцлагагүй алдаа гаргасан хэмээн тайлбар өгч Өргөө амаржих газар уучлал хүсчээ.
Харин УОК-ын дарга, шадар сайд Я.Содбаатар Гүйцэтгэл дээр алдаа гаргасан, хүнлэг бус харьцсан холбогдох хүмүүст хариуцлага тооцохыг Эрүүл мэндийн сайдад үүрэг болголоо гэж өөрийн фэйсбүүк хуудастаа бичжээ.
Гэвч иргэд Энэ бол зүгээр уучлалт хүсээд өнгөрөх зүйл яавч биш гэдэг байр суурийг идэрхийлэн төв талбайд УОК огцор гэсэн байр суурийг илэрхийлж байна.
УОК-ын хийж хэрэгжүүлж байгаа ажил учир дутагдалтай байгааг иргэд жишээ татан хэлж байлаа. Тайван жагсаалд өөрсдийн байр сууриа илэрхийлж байгаа иргэдийн хүсч байгаа зүйл Хүнлэг байхыг, Хүн байхыг хүсч байлаа.
Нөгөөтэйгүүр цар тахлын энэ үед төр засгийн шийдвэрийг хэрэгжүүлэгч төрийн дунд, доод түвшиндээ ямар ч уялдаа холбоогүй ажиллаж байгааг энэ үйл явдал илхэнээ харуулж байна.
