Коронавирусний эсрэг вакцинжуулалтад өнөөдрийн байдлаар манай улсад 9531 хүнийг хамруулаад байгаа талаар ХӨСҮТ-ийн Дархлаажуулалтын албаны дарга О.Дашпагма мэдээллээ. Энд эмч, сувилагч зэрэг эрүүл мэндийн ажилтнууд, мөн "COVID-19″-ийн халдварыг илрүүлж эмчлэх, хариу арга хэмжээнд оролцож буй багийн гишүүд болон энд дайчлагдан ажиллаж буй бусад салбарын ажилтнуудыг хамруулж байна. Вакцинжуулалтыг нийслэлд дархлаажуулалтын лавлагаа болон дүүргийн Эрүүл мэндийн төвүүдэд байрлаж буй 22 цэгт хийж байна.
Тэрээр, вакцин хийлгэсний дараах урвал хүндрэлийн тандалтын байдлыг дархлаажуулалтын тогтолцооны хүрээнд тогтмол хянан хийж буйг хэллээ. "Вакциныг хэрэглэх заавар дээр тусгасан урвалууд ерөнхийдөө илэрч байгаа. Заавар дээр заасан урвалууд нийт вакцинд хамрагдсан хүмүүсийн 50-60 хувьд вакцин хийлгэсний дараа илрэхээр байгаа. Манай улсад вакцин хамрагдаад буй хүмүүсийн 40 орчим хувьд урвалын дараах шинж тэмдэгүүд илэрч байна.
Эдгээрт халуурах, толгой өвдөх, бие жихүүдэх, мөн хэсэг хүмүүст вакцин тариулсан газар хөндүүрлэх зэрэг шинж тэмдэг илэрч байна. Эдгээр нь 2-3 хоногийн дараа өөрөө арилж байгаа. Хэрэв шаардлагатай бол шинж тэмдэгийг арилгах эмчилгээг эмчийн зааврын дагуу хийлгэж болно" гэдгийг хэллээ. Одоогоор вакцины дараах ноцтой хүндрэл, урвал илэрч бүртгэгдээгүй, дархлаажуулах үйл ажиллагаа хэвийн явагдаж байгааг мэдээллээ.
"Вакцинжуулалтад өдөрт хичнээн хүнийг хамруулж байна. Эхний 7 хоногт 8000 орчим хүнийг вакцинжуулсан. Дархлаажуулалт удаж байгаа юу?" гэсэн сэтгүүлчдийн асуултад тэрээр, хоногт 1700 хүнийг хамруулж байна. Цар тахлын нөхцөлд хүн хоорондын зай барих, вакцинжуулалтын өмнө заавал эмчийн үзлэгт орох, вакцин хийлгэсний дараа 30 минут ажиглах зэрэг заавартай, эдгээр дүрэм журмыг мөрдөн ажиллахад тодорхой хугацаа ордог гэв. Манай улс коронавирусний эсрэг вакцинжуулалтыг 2 дугаар сарын 23-нд эхлээд байгаа юм.
