Боловсролын чанарын үнэлгээний тогтолцоог бий болгож чадаагүй учраас манай багш нарын цалин урамшуулал, нийгмийн хамгаалал, хөдөлмөрийн үнэлэмжийн асуудлууд маш их орхигдсон. Хүүхдэд оногдох хувьсах зардлын аргачлалыг өөрчлөх цаг болсон. Багшийн ажлын гүйцэтгэл, сурагчийн сурлагын ахиц дэвшлийг үнэлдэг тогтолцоо руу шилжиж байж боловсролын салбарын цалн хөлс, урамшууллын тогтолцоо шударга, үнэн зөв болно.Үндсэндээ багш, сурган хүмүүжүүлэгчдийн суурь цалин бага байгаагийн учир нь бүх нэмэгдлүүд суурь цалингаас бодогддог. Бид багш нарын суурь цалинг нэмж өгч байж дараа дараагийн урамшуулал нь багш нарт бодитой орлого болж чадна. Өмнө нь багш нар маань урамшууллыг цалингийн нэг хэсэг гэж ойлгодог байсан. Тэгэхээр бид үр дүнгийн урамшууллыг цалингийн нэг хэсэг болгоод суурь цалинг нэмье.Энэ нэмэгдсэн суурь цалингаас цаашаа гүйцэтгэлд суурилсан урамшууллын тогтолцоо руу шилжинэ. Дээр нь нэмж хэлэхэд манай багш нарын цалин багаас гадна хичээл практикийн зардал, интернетийн төлбөр гэх мэт нилээд их мөнгийг багш нар өөрсдөө халааснаасаа гаргадаг.Түрүүн хэлсэн нэг хүүхдэд оногдох хувьсах зардал дотроо цалин хөлснөөс гадна хичээл практикийн, интернетийн төлбөрийг тооцоод багшийн халааснаас гардаг мөнгийг багасгаад өгвөл багш нарын орлого тодорхой хэмжээнд нэмэгдэнэ. 2022 оноос Суурь зардал, хувьсах зардал дээр нэмэх нь үр дүнд суурилсан гүйцэтгэлийн урамшууллын санхүүжилт шинээр нэмэгдэнэ.
